Friday, March 16, 2018

कट प्रॅक्टीस नी देवऋषी प्याकेज



--- प्रा.हरी नरके

ओ दादा, त्यो लेता मंगेशकर दवाखाना कुठं हाय वो?
लता मंगेशकर नाय ओ, दीनानाथ मंगेशकर दवाखानाय तो. असंच नदीच्या काठाकाठानं जावा, डाव्या हाताला हाय बगा.

दवाखान्यात चाल्ले जणु. काय बरंगिरं नाय का?
समदं ठनठनीत हाय. तिकडं भरती चाल्लीय नव्हं?
भरती? कशाची?

देवऋषी लोकं, बुवा, बापू, म्हाराज, लई पोस्टी खाली हायत म्हणं.
ते च्यायनलवाले तिकडंच जाऊन राह्यले बघा.

नगं नगं, त्यांचा संमंध नको बाबा. लई बाराची असत्याती च्यायनलवाले. आता बघा कोण्ताबी च्यायनल लावा, वास्तूशास्त्र नायतर राशीभविस्य चालू अस्ताय का नाय? आनी तरी पन आमच्याच बिजनेसवर टिका करत्याती. ही गद्दारी नाय?

मी काय म्हणतो, तुमी एखांदा लेक लिवा की दादा. जशी जनरिक काय ती औषादं सस्तात असतात, तसं परत्येक दवाखान्यात देवऋषी लोकं, बुवा, बापू, म्हाराज सस्तात उपच्यार करतील. काय हारकत हाय?

ह्यो आंदसरधा कायदा झाल्यापास्नं मायला, पोलीसं सांभाळा, दाक्तरला कट द्या. झालंच तर ते आंदसरधावाले हायतच.
त्यांचं लई बरंया. काम ना धाम, मोकार पब्लीसिटी. तीबी फुकटात. वर आनि आवार्डं अस्तायच.

मपल्यावाला एक पाईंटचा डायरेक्ट मुद्दाय.
मायला, दवाखाना आमचा, पेशंटबी आमचा. झालंच तर डाक्तर नी देवऋषीबी आमचा. मी काय म्हन्तो, सिव्या द्यायला तुमाला फकस्त हिंदूच कसे काय दिस्तात वो? त्ये त्ये काय आंदसरधावाले नस्तात काय म्हण्तो मी?

मपलं एक प्याकेज हाय. परत्येक दवाखान्यात एक मंदिर अस्ताय का नाय? त्याच्या बाजूला नरेंद्रमाहाराज कोकनवाले डिपारमेंन काढ्यायचं. एक खोली पोलीस आन आंदसरधावाले यांना बी द्यायची. परतेकाचं परसेंटेज आधीच फिक्स करायचं. नंतार भुनभुन नको. कट प्रॅक्टीस हायच तर आता प्याकेजबी घ्या मायला.

आन परत्येक दवाखान्यात एखांदी खोली डाक्टर लोकांनाबी द्यायला आमची हारकत नाय बरंका!

नाह्य तरी आपल्या सौंस्कुरतीत म्हनलेलंच हाय बरं का एक तीळ सात जनांनी वाटून खावा म्हनूनशानी.... एका देवऋशामुळं किती लोकान्ला रोजगार मिळून राह्यला बघा तरी राव. एक पेशंट, एक आंदसरधावाले, एक डाक्तर, एक पुजारी, एक दवाखानावाले, चारपाच वकीलवाले, पाचसाहा पोलीसवाले, साताट च्यायनलवाले आणि कोरटवाले बघा किती मायंदाळ रोजगाराला, पोटापाण्याला लागले. हाये का नाय पुण्य़ाचं काम?

चाय आन पकोड्यामंदी एव्हढं रोजगार हाय का? आता तरी कबूल करा राव हाच हाय खरा आन राष्ट्रीय रोजगार!
-- प्रा.हरी नरके

No comments:

Post a Comment